memoria dinámica de acceso aleatorio

A maior parte dos módulos de memoria RAM instalados na actualidade son dinámicos, porque o seu prezo é inferior aos módulos estáticos. A diferenza coas estáticas consiste en que a información se perde co paso do tempo. Para evitar isto, é necesario lembrarlle os datos á memoria cada pouco tempo, o que se denomina 'tempo de refresco'. O refresco da memoria en modo normal está a cargo do controlador da memoria, que tamén cumpre a función de optimizar o tempo requirido para a operación do refresco. Algunhas memorias dinámicas deixan o coidado do refresco a circuítos externos, pero outras teñen a lóxica de refresco no mesmo chip. As RAM dinámicas son moito máis difíciles de conectar e de controlar internamente cás estáticas, inconveniente que se compensa porque as dinámicas teñen maior capacidade.